|
|
Námssvið leikskóla:
Áhersluþættir í
leikskólauppeldi eru hreyfing, málrækt, myndsköpun,
tónlist, náttúra og umhverfi og menning og samfélag.
Hreyfing:
Börn hafa ríka þörf fyrir að hreyfa sig frjálst og
óhindrað, því ber að leggja áherslu á hreyfingu barna og
hreyfiuppeldi.
Börn tjá sig snemma með hreyfingum, þau skynja líkama
sinn og finna styrk sinn og getu.
Góð hreyfifærni eykur sjálfstraust barna og hreyfing
bætir heilsu, snerpu og þol.
Málrækt:
Tungumálið er mikilvægasta tæki manna til boðskipta. Í
samtölum, með krefjandi spurningum, með því að lesa
fyrir börnin, segja þeim sögur og kenna kvæði og þulur
er lögð áhersla á málrækt.
Hvetja þarf börn til að færa rök fyrir máli sínu, einnig
skal hvetja þau til að spyrja, segja frá og hlusta með
athygli.
Málörvun er best sinnt í leik, einnig eru flestir þættir
leikskólastarfs vel fallnir til málörvunar.
Myndsköpun:
Börn hafa ríka þörf fyrir að tjá sig með myndmáli, þau
eiga auðvelt með að tjá tilfinningar sínar í myndsköpun,
sem eflir líka sjálfstraustið.
Því skal veita börnum fjölbreytileg tækifæri til að tjá
sig í myndum og margs konar mótanlegum efnum.
Tónlist:
Börn eiga að fá ríkuleg tækifæri til að njóta tónlistar
og iðka hana. Þá er átt við söng, hreyfingu, hlustun, og
leik með hljóðgjafa.
Tónlistina er best að flétta inn í sjálfsprottinn leik
barnanna, hljóð, hrynjandi, og hreyfingu.
Stuðla þarf að því að börnin þroski með sér næmni fyrir
hljóðum, hreyfingu, og hrynjandi ásamt frumkvæði og
frjálsri skapandi tjáningu og túlkun á tónlist.
Náttúra og umhverfi:
Börn þurfa að kynnast fjölbreytileika náttúrunnar og
njóta hennar um leið og þau læra að finna til ábyrgðar
gangvart henni. Því eiga börn að fá fræðslu um
náttúrunna, umhverfið og verndun þess.
Þessu verður best við komið með ferðum út í náttúruna
þar sem börnin gera sínar eigin athuganir og vinna úr
þeim eftir getu.
Einfaldar eðlis- og efnafræðitilraunir vekja líka áhuga
og ánægju barnanna.
Menning og samfélag:
Leikskólastarf á hverjum stað mótast af umhverfi sínu,
atvinnu-, félags-, og menningarlegu.
Leikskólinn þarf líka að taka tillit til mismunandi
fjölskyldugerðar og uppruna barnanna og efla tilfinningu
þeirra fyrir því að þau tilheyri samfélaginu og séu
hluti af því.
Þessu má stuðla að með samskiptum við starfsemi utan
leikskólans og nýtingu umhverfisins til vettvangsferða
og leikja.
|
Undirstöðuþættir og
námssvið leikskóla:
 |
|
|
