|
|
Dagskipulag
Naustatjarnar:
Mikilvægt er að dagurinn sé eins frá degi til dags, það
veitir börnunum öryggi að vita hvað er að gerast í
kringum þau.
Daglegar venjur s.s.
matartímar, hvíld, samverustundir, útivera og aðrir
fastir liðir eru í starfsemi skólans.
Foreldrar fá afhent dagskipulag deildar barns síns á
kynningarfundum við upphaf skólagöngu barna sinna.
Leikur barnanna:
Þegar börnum býðst mismunandi verkefni á sama tíma gefst
þeim kostur á að velja þann leik og leikefni sem þau
hafa áhuga á. Á þennan hátt verða börnin virk í
þroskaferli sínu.
Börnin ákveða sjálf í hvaða leikjum þau leika sér og þau
hafa ánægju af þeim. Í gegnum leikinn er hægt að vinna
markvisst að eflingu alhliða þroska barnanna og þau eru
hvött til að nota ímyndunarafl sitt, hugsun,
sköpunargleði og skynjun til að uppgötva heiminn á sinn
margvíslega hátt. Leikjum barna má flokka niður í fjóra
aðalflokka eftir inntaki þeirra og uppeldis/
menntunargildi.
Margir leikir eru fjölþættir og þeir geta flokkast undir
fleiri en einn flokk.
1. Skynfæra- og hreyfileikir;
innan þessa flokks er hægt að skipta leikjunum niður í
hreyfingu, tónlist, vatnsleiki og ferðir.
2. Sköpunar- og byggingaleikir, innan þessa flokks eru
listsköpun og byggingaleikir.
3. Hlutverka- og ímyndunarleikir.
4. Regluleikir
 Hópastarf:
Í hópstarfi er börnunum skipt í hópa eftir aldri og
þroska, í hverjum hóp eru 5-8 börn og einn til tveir
umsjónarkennarar.
Í hópastarfinu eru tekið fyrir ákveðið þema sem alltaf
eru áhersluþættir skólans, náttúra og umhverfi og
samfélag og menning. Hvernig unnið er með þessa þætti ræðst
af hugmyndum og getu barnanna, því þau ákveða hver fyrir
sinn hóp viðfangsefni vetrarins.
Umsónarkennarar leggja auk þess fram verkefni og efnivið,
þeir eiga alltaf til ráð og hugmyndir til að vinna með.
Hópastarfstímarnir hafa alltaf ákveðið upphaf s.s. að
börnin í hópnum heilsast og ræða saman um hvað verður
tekið fyrir í þessum tíma og síðan er ákveðinn endir þar
sem börnin þakka fyrir hópastarfið og kveðjast.
Uppbygging hópastarfsins:
Upphaf - börnin fara í hring, leiðast og
heilsast, fara í orðaleiki, syngja eða fara með þulu.
Upphitun - hreyfing, hreyfisöngvar eða stuttir
leikir.
Könnun - verkefni dagsins útskýrð.
Aðalæfing - Það verkefni sem börnin vinna að
hverju sinni.
Frásögn - börnin fara í hring og segja frá því
sem þau hafa verið að gera og hvað þeim finnst um
verkefnið.
Endir - börnin leiðast, kveðja og þakka fyrir
stundina.
Ekki er ætlast til þess að farið sé í
alla þessa þætti hverju sinni, heldur valdir ákveðnir
þættir hverju sinni. Þó er gott að hafa alltaf eins
upphaf og endi.
Samverustundir:
Í samverustund gefst börnum og lkennurum
tækifæri til að eiga saman notalega stund í ró og næði.
Þá er hægt að lesa, syngja og spjalla saman um það sem
vekur áhuga hverju sinni og um daglegt líf barnanna.
Gjarnan er farið inn með tónlistarvagn skólans þar sem
börnin kynnast hljóðfærum og frum- og túlkunarþáttum
tónlistar.
Í þessum stundum eru börnin á svipuðum aldri.
Útivera:
Útivera er mikilvægur þáttur í uppeldistarfi
skólans, þar sem grófhreyfingum og frjálsum leik er
gert hátt undir höfði. Útiveran er holl öllum frískum
börnum. Í útiveru fer ekki minna nám fram en inni, því
er ekki síður mikilvægt að huga að því að útisvæðið sé
skapandi.
Utan dyra geta börnin leyft sér ærslaleiki, hróp og
köll. Þar geta þau hlaupið, hoppað, stokkið og klifrað.
Leikvöllur skólans er vel fallinn til alls
konar hreyfileikja, bæði sjálfsprottinna og skipulagðra.
Ýmsir hlaupaleikir reyna verulega á þrótt barnanna og
úthald, örva hjartslátt og blóðrás.
Sumir foreldrar óska eftir inniveru fyrir börnin sín í
því skyni að verja þau gegn veikindum, en það er ekkert
sem bendir til þess að börn sýkist frekar í útilofti en
innandyra. Börn sem dvelja langdvölum innandyra eru oft
kulsælli og viðkvæmari en þau börn sem vön eru útiveru.
Fimm ára starf:
Þegar börnin eru á síðasta vetri sínum í skólanum
fara þau í fimm ára starf, en þessi aldurshópur gerir
miklar kröfur um að hafa nýja og spennandi hluti til að
glíma við. Þau fá að vinna með ýmis efni sem eingöngu
eru notuð með elstu börnunum, þau gera tilraunir, fara
mikið í ferðir og skoða samfélagið sem þau búa í, unnið
er með almenna þekkingu og færni þeirra í ýmsum þáttum.
 Yngstu börnin:
Sérstaklega er unnið með yngstu börnin, Þarfir þeirra
eru að mörgu leiti aðrar en eldri barnanna, þau hafa
meiri þörf fyrir líkamlega umhyggju, stöðugleika, öryggi
og meiri einstaklingsumhyggju.
Í starfinu með yngstu börnunum er lögð áhersla á
leikinn, þar sem skapaðar eru aðstæður sem virka
áhugavekjandi og hvetjandi. Hver dagur hefur sinn fasta
ramma sem börnin eru fljót að venjast og finna sig örugg
í. |
|
